حسب توجيهات السيد..أشتي أخلس جلدة..!

كتب بواسطة "فارس أبوبارعة"

صرفوا له سيارة قلنا سهل..طيرماني ومن ال البيت ضروري يصرفوا له سيارة من الخمس حق الله ورسوله وذو القربى واليتامى والمساكين وابن السبيل..بس يخزن بخمسة الف ريال ويشل الصعاليك حقه في الحصبة ويسير يسمر جنب نوافذ البيوت ..هذي ما اعتقدش انها من الخمس نهائيآ الا اذا كان تمت اضافتها او لقي حديث نبوي كان ضايع بين الاوراق حق جده انه يستلم الخمس ويخزن بخمسه الف ويشتري باكت شقارة ويجمع اصحابة ويسيروا الحصبة جنب غرف النوم حق بني أدم فاتحين زوامل ومجبر وقهقهات حتى مطلع الفجر..مدري يمكن لقي له حديث من حق البرامكة..!

اقرا ايضا :خارجون عن الوطنية

حللتها وقلبتها ما رضيت تستوي..قلت يمكن بيسير يدكي يحرس الحارة..قال ابليس الحراسة مش جنب غرف النوم حق بني ادم..قلنا يا ابليس خذها على السلاليم انت شرير يمكن الراجل يشتي يسترق السمع ويسمع نعمان وزوجته لو هم عملاء آخر الليل..قال ابليس..

شخصيآ ما قد فكرت اسير استمع عند النافذه..شوف ان منير المتوكل هو الشرير كيف الخطورة فيه..قلنا يا ابليس منير المتوكل الملقب ابوهاشم والساكن في الحصبة ولي من اولياء الله كان قصده شريف..والدليل أنه كان هو المشرف من قبل خالد المداني على بيع ادوات مستشفى سبل الحياة حق ابن الدنبوع بقيمة تخزينة..من مستشفى المؤيد..قال ابليس..قد فعلت في العالم فعايل لكن افعال الطيرمانات والله ما قد فعلتها..فطلع ابليس نهدة ابو اسد وقال..انت عارف ليش ما رضيت أسجد لجدكم يا فارس..قلت له ليش..قال لاني عارف أن من صلبه تظهر هذه الطيرمانات..والله لو يحرقني ربي ويعذبني في ستين جهنم ما سجدت لهذه الطيرمانات الباخسين..قلت له يا ابليس اتقي الله وتوب..قال..

اقرا ايضا : "هاله" تكشف الفجوة بين الاتحادات النسوية والمرأة في حضرموت

رحلك مني..جهنم اخرج لي منكم..شوف منير المتوكل سار يدكي ويسمر وجنب الطاقة حق بيت نعمان العوبلي ولما خرج نعمان العوبلي يقله يا اخي رحلك من هانا ماهو سابر تسمروا جنب الطاقات حق بيوت الناس..زعل منير المتوكل وقام هو واصحابه يخرطوا البنادق في المسكين نعمان العوبلي وكمان ضربوه حتى سال الدم من كل بنانة في جسده..هيا.ما رأيك يا فارس..انا قد شفتوني جنب أي طاقه..وانا ابليس بكله ومطرود من الجنة لكن عادني قبيلي عسر حرام ما بين اجلس جنب طاقه وعاده مش مستحي عاده بيضارب..هيا رحلك مني يا فارس.

.اسير اشوف لي امة غيركم..اما طيرماناتكم فقد أخذت كل شيئ وتفوقت على مشاريعي..وماعد فيش خراج اجلس بصنعاء شأرحل والطيرمانات تقوم بالواجب واكثر..وقام قفز من قدامي..هاه..يا ابليس..يا يهودي..يا مزنعر..يا وغد تعال باقي موضوع اشتي اجابرك..وهو مفحط..قال اذا منير المتوكل واصحابه دخلوا سجن او عالجوا نعمان العوبلي او لقيتوا من يضبطهم راح اعلن توبتي وارجع اليكم مسلم واسجد لكم سبعين ركعة..لو لقيتوا من يضبط منير المتوكل احلقوا ذقني بحذاء..لكن انا عارف ما معي حرام انها مخبوصة وان الطيرمانات تطلع صاحبها صاحب الحق والمظلوم نعمان تطلعه امريكي اسرائيلي يهودي رغم اني اعرفه مسكين الله من حجر بالمحابشة طالب الله على جهالة فوق سيارة تكسي .

.جاء له ولي الله منير المتوكل ضربه وعاده زاعل..وقال ابليس..عمري كله ما اقتهرت على بشر الا على نعمان وسائق التكسي اللي بهذلت به ندى الوزان..مدري مالهم الطيرمانات على اصحاب التكاسي..يمكن يشتوا يغيروها بشاصات ولوفر وفرينتشال وغيرها.. وداعا

اقرا ايضا :لا صوت يعلو فوق صوت اليمن الاتحادي

فارس أبوبارعة

اقرا ايضا :تربية ساحل حضرموت والبحث عن التميّز

للمزيد من الأخبار..... زوروا صفحتنا على موقع التواصل الاجتماعي  linkedin

للمزيد من الأخبار..... زوروا صفحتنا على موقع التواصل الاجتماعي  Google+

للمزيد من الأخبار..... زوروا صفحتنا على موقع التواصل الاجتماعي  pinterest

لمراسلتنا وتزويدنا بالأخبار المختلفة على الائميل :

hadramoutfirst@gmail.com

جميع الحقوق محفوظة لموقع #حضرموت_اليوم © 2017